CASE #040 | Tips in Reviewing for LET

We are now halfway through August and if I am not mistaken, the next LET exams would be scheduled this September. Kinakabahan ka na ba?

Dapat lang. Kasama iyan sa excitement ng LET journey mo. Hindi ka nag-iisa. Lahat ng mga sumubok mag-LET pinagdaanan ang pinagdadaanan mo ngayon. Kapit lang, Bes! Kaya iyan. Yes, you can!

From a former LET taker and a LET passer, allow me to share some tips in reviewing for LET.

1. Extra Effort Na, Bes!

Kung noong July ay tatamad-tamad at pasilip-silip ka lang sa reviewer mo, I suggest na mag-double time ka na ngayon. Mas titindi ang pressure mo kapag tumuntong na ang kalendaryo sa September. Kaya hatiin mo na ang natitirang araw ng August para sa review time mo. Kung dati ay isa or dalawang oras lang per day, mas maganda kung dodoblehin mo na.

2. Mangoleksyon na ng reviewers.

Kung nagre-review center ka, I’m sure may mga reviewers na provided ang review center mo for you. Kasama naman kasi iyon sa binayaran mo. Pero hindi masamang humanap ka rin ng kopya ng ibang reviewers mula sa ibang review centers. Hindi ko pino-promote ang plagiarism. Hindi mo naman siguro ibebenta at pagkakakitaan iyong reviewers, di ba? May ibang questions kasi sa ibang review centers na wala sa reviewers ng review center mo and vice versa.

Sa pagkakaalam ko kasi, hinihingan din ng PRC ng questions ang mga kilalang review centers na gagamitin sa LET lalo na sa General Education. Kaya mas maganda kung aware ka rin sa mga questionnaires ng ibang review centers. Malay mo may isa o dalawa dun ang lumabas sa LET. It can make a difference sa score mo.

3. Notes, Notes, Notes!

Proven naman ng mga studies na mas malaki ang chances na ma-retain sa memory natin ang mga bagay-bagay na sinusulat natin. Kaya take note mo lahat ng formulas, keywords, ACRONYMS, anagrams, at kung anu-ano pang important details. Isulat mo sa index cards, Manila Paper, or sticky notes at idikit mo sa dingding ng kwarto mo. Para kahit nagbibihis ka or pagkabangon mo pa lang sa umaga nakikita mo na agad sila.

4. Highlight Galore!

Napakyaw ko na yata lahat ng kulay ng highlighter sa National Bookstore nung nagre-review ako. May codes pa ako para sa bawat kulay. Iyong main word or term ibang kulay, iyong definition iba rin. Iyong examples or enumerated bullets iba rin. Kaya kapag tinignan mo ang reviewer ko, makulay ang buhay!

Nakakatulong din iyon kasi nakakagising ang mga kulay ng highlighters. Kapag nagbabasa ka, hindi ka agad aantukin or mawawala sa binabasa mo.

5. Gumamit na ng answer sheet.

Mas maganda kung gagamit ka na ng answer sheet sa pagsasagot. This way masasanay kang mag-shade ng mag-shade dahil during exam day, buong araw kang magshe-shade ng sagot. Hindi rin biro iyon ha. Nakakangawit at nakakamanhid ng kamay. Nakasalalay din sa shading ang pagpasa mo. Kasi kapag lumampas ka sa circled area or hindi masyadong dark ang pagkaka-shade mo, pwedeng mag-skip ang machine sa pagche-check.

Kaya magpa-photocopy ka na ng maraming answer sheets at dun na mag-practice magsagot. Train mo na rin ang sarili mo na magsagot ng walang erasures, mabilis, at maingat. Sacred ang answer sheet. Hindi dapat madumihan, mabasa, or worse, mapunit. Kaya pag-aralan mo na kung paano makakapag-shade at sagot ng maayos.

Gumamit na rin kayo ng number 2 pencil. Para masanay din kayo sa kapal or nipis ng lead ng pencil na ito. You can try more than just one brand. Para mahanap mo kung saan ka mas komportable. Pati na rin sa eraser. Test-ingin mo na ang eraser na effective pambura ng black marks na hindi marurumihan or masisira ang answer sheet.

6. Mag-review sa lahat ng klase ng environment.

Alam ko kanya-kanya tayong ritwal ng pagre-review. Merong gusto tahimik na tahimik. Para maka-focus at fully concentrated. Iyong iba gusto may music para nakaka-relax. Iyong iba naman matao at maingay para hindi antukin.

Do not stick to one review habit. Subukan mong magsagot ng drills sa maingay na lugar kung sanay ka sa tahimik. Kung air-conditioned naman ang kwarto mo, subukan mong magsagot sa kwartong walang air-con at walang electric fan. Kung music lover ka, try mo magsagot ng drills ng walang music. Kung trip mo maingay, try mo naman sa tahimik.

Bakit?

Kasi PRC ang mag-a-assign ng examination rooms. May chance na mapunta ka sa mga public schools na walang air-con o electric fan man lang. Meron akong friend na ganyan. Naglalapot na ang kili-kili niya sa sobrang init. Alternate ang pagpapaypay at pagsasagot. Kaya ngayon pa lang ikondisyon mo na ang sarili mo.

Bawal ang cellphones o kahit anong electronic gadget sa testing center. Kaya walang means para magpatugtog ng music. At kung meron man, tiyak na hindi ka papayagan ng proctor. Kaya sanayin mo na ang sarili mong magsagot ng walang kasabay na playlist.

Meron akong isang friend, na-assign sa exam room na may katabing construction site. Dahil Linggo, pahinga ang mga workers. Pero meron naman silang lunch salu-salo. Kaya ayun, nagsiga at barbecue sila sa site na ang usok pasok sa classroom ng exam room nila. Not to mention ang ingay ng nagvi-videoke sa barangay. Sumakit ang ulo niya dahil sobrang distracting ng paligid at sanay siya sa tahimik na room.

Ako naman, napunta sa classroom na ubod ng lamig. Iyong nakatutok sa likod ko ang air-con. Iyong kamay ko nanginginig hindi sa kaba kundi sa sobrang lamig. May dala naman akong jacket na may hood. Pero bawal kasi mag-hood dahil kailangan nakikita ng proctor ang pagmumukha mo. Kaya medyo tiis-ganda talaga.

Meron ding mga desk or armchairs na baku-bako at uka-uka na. Iyong tipong mabubutas ang kahit anong papel kapag nagsulat ka. Lahat talaga ng klaseng distraction pwede mong ma-encounter during exam day. Kaya mas maganda if magiging mas flexible ka.

7. Time yourself.

Subukan mo nang magsagot ng naayon sa time limit ng mismong exam. Hindi ko na masyadong matandaan pero parang 2 hours yata for General Education and 3 hours for Professional Education. Pwede niyong i-confirm ito sa mga review centers na pinag-re-review-han ninyo or sa mga kakilala niyong nagre-review doon. Another 3 hours yata kung may Specialization which is applicable sa mga Secondary Teachers.

Mas magandang ngayon pa lang ay masanay na kayo para mabawasan ang pressure sa mismong day ng exam. This way, maba-budget niyo ng maayos ang oras niyo per subject or per question. Makaka-discover rin kayo ng mas mabilis na paraan ng pagsagot na komportable sa inyo.

Meron akong ibang friends mas prefer nila sagutan muna sa test booklet tapos saka ishe-shade sa answer sheet. Para nga naman walang erasures talaga at maingatan ang answer sheet. Ang downside lang is kung maubos na ang oras mo at magmamadali kang mag-shade. May chance na magkapalit-palit ang mga sagot mo dahil sa sobrang pagkalito.

Nasa iyo na iyon. Subukan mo na ngayon kung anong technique ang sa tingin mo mas workable for you.

8. Pati pagkain sanayin mo na rin.

May nag-tip sa akin noon na kung ano raw ang lagi kong kinakain noong nagre-review ako, iyon din daw ang baunin ko on the examination day para raw mas matrigger ang memory ko at maalala ko ang mg ani-review ko. Wala namang mawawala kaya sinunod ko na rin. Hopiang monggo na galing Tipas ang kinakain ko nun. Kaya iyon din ang baon ko noong exam day.

Kung bet niyong sundin ang tip na ito, kayo ang bahala. Ang sa akin lang, anuman ang pagkain at inumin ninyo, pag-aralan niyong kainin iyon nang hindi nadudumihan ang answer sheet. Aabutan ka rin kasi ng gutom during the exam day. Hindi naman bawal kumain ng snacks during the exam. Kung kaya mong kumain ng kanin at ulam na hipong binabalatan pa ang ulam mo, go! Basta ang importante, malinis at walang bahid ang answer sheet.

9. Take note of keywords within the question.

Ang test booklet pwedeng sulatan. Kahit anong gusto mong isulat diyan pwede. Pero may ibang proctor na ayaw ipasulat ang formula sa booklet. Case to case basis ito.

Ang tip ko is bilugan, underline, or anu pa man. Basta markahan mo na agad ang keyword sa question. Kung my NOT, NON-, WITHOUT, NEITHER, or any word that connotes na opposite ng tanong ang sagot, markahan mo na rin. Para kapag nagbasa ka na ng choices, hindi ka na malito. Ma-eliminate mo na agad iyong choices na wala namang connection sa keyword or hindi naman kabaligtaran ng nasa tanong.

Ganun din sa choices. Ekisan or markahan mo na agad ang choices na obvious namang hindi tama. Distractors lang iyon at pampagulo. Normally, may maiiwang dalawang sagot diyan na mukhang parehong tama. Lalo na sa Professional Education. Basahing maigi ang dalawang choices na matitira pati na rin ang tanong. Based sa keyword na minarkahan mo, alin dun ang pinakamalapit o pinakakumpleto? Iyon ang piliin mo.

Huwag na huwag ka ring sasagot ng E. Ang sagot na iyon ay inilagay upang lituhin ka lang. Walang sagot na E. Lahat ng tanong, no matter how ridiculous it may sound, has an answer. If worse comes to worst, hulaan mo na lang. Pero never answer E.

10. Befriend your Scientific Calculator.

Utang na loob, Bes. Huwag namang calculator na pampalengke ang gamitin mo. Iyong kada pindot mo ng keys ay may tunog. Hindi naman ipinagbabawal iyon pero napakaingay at nakaka-distract. Baka pati ikaw malito sa pinagpipindot mo. Saka magtatagal ka lang sa pag-compute kasi may mga scientific calculators na kayang mag-compute in fraction form. Iyong hindi ka na kailangang mag-convert into decimal. Meron ding kaya ang mga polynomials at yung PEMDAS.

Invest ka lang ng kaunti. O kaya ay manghiram sa kakilala. Mas maganda kung ngayon mo na hiramin or bilhin para mapag-aralan mo ang lahat ng functions at maging familiar ka sa paggamit nito. Kasi kung mismong exam day mo hihiramin, baka malito ka lang lalo. Nangangain ng tanga ang scientific calculator!

Merong mga specific brands and models ng calculator ang allowed lang ng PRC. You can check their site o kaya naman ask your review center for it.

Sana ay makatulong ang mga tips na ito sa inyong pagre-review. Watch out for more posts regarding LET at kung may mga tanong kayo, you can comment on this page. Subscribe na rin to stay updated sa mga posts ko maski iyong hindi tungkol sa LET.

Good luck, LETers!

#